Яшчэ год таму фельчар Беліцкага фельчарска-акушэрскага пункта Вікторыя Астроўская з цяжкасцю паспявала за дзень наведаць пацыентаў у дзвюх вёсках. З цяжкай медыцынскай торбай ёй даводзілася пешшу пераадольваць не адзін кіламетр паміж населенымі пунктамі.
Зараз Вікторыя за дзень паспявае аб’ехаць 4-5 вёсак. Гэта стала магчымым дзякуючы электраровару, набытаму ў рамках ініцыятывы «Не губляючы часу».
Дадзеная ініцыятыва дазволіла забяспечыць двухколавым транспартам усе 18 ФАПаў Сенненскага раёна. Медыцынская дапамога для сельскіх жыхароў стала больш даступнай і аператыўнай. Цяпер Вікторыя Астроўская і яе калегі-фельчары могуць наведаць больш пацыентаў у аддаленых вёсках і хутчэй да іх дабрацца. З купляй электраровараў час на дарогу фельчараў да пацыентаў скараціўся ў 3-5 разоў.
Амаль у два разы павялічылася колькасць перанакіраванняў выклікаў з раённай бальніцы на ФАПы, што дало магчымасць скараціць транспартныя выдаткі на выезды машыны «хуткай дапамогі». За некалькі месяцаў эканомія паліва склала амаль 200 літраў. Паляпшаюцца і паказчыкі дыспансерызацыі жыхароў раёна, што ў перспектыве дасць магчымасць знізіць нагрузку на раённую бальніцу і палепшыць дэмаграфічныя паказчыкі Сенненскага раёна.
Ініцыятыва «Не губляючы часу» была рэалізаваная Сенненскай раённай арганізацыяй грамадскага аб’яднання «Беларускі саюз жанчын» у партнёрстве з мясцовай бальніцай. «Не губляючы часу» − гэта адзін з пераможцаў I Конкурсу мясцовых ініцыятыў, праведзенага ў рамках праекта «Прафілактыка неінфекцыйных захворванняў, прасоўванне здаровага ладу жыцця і падтрымка мадэрнізацыі сістэмы аховы здароўя ў Рэспубліцы Беларусь» (БЕЛМЕД). Гэты праект фінансуецца Еўрасаюзам і рэалізуецца агенцтвамі ААН.
