У Камарова 9 снежня 2017 года прайшоў другі Стартап Уікенд. Выпускнікі Школы сельскага бізнесу прэзентавалі падрыхтаваныя падчас навучання бізнес-планы і змагаліся за адзнакі строгага журы. Канкурсанты прыводзілі важкія довады, чаму фінансавую падтрымку неабходна аказаць менавіта іх мясцовай прыватнай ініцыятыве.
Стартап Уікэнд стаў завяршальным мерапрыемствам для слухачоў Школы сельскага бізнесу ў Камарова, якія праходзілі навучанне са жніўня па лістапад 2017 года. Падчас заняткаў пачаткоўцы і вопытныя бізнесмены з 4 раёнаў ‒ Смаргонскага, Мядзельскага, Пастаўскага і Астравецкага вучыліся асновам бізнес-планавання і атрымлівалі кансультацыі.
Членам журы трэба было ацаніць перспектывы прыватных ініцыятыў, якія былі распрацаваны ўдзельнікамі, і вызначыць, каму дастанецца фінансавая падтрымка праекта Еўрапейскага саюза "Развіццё сельскіх тэрыторый у Рэспубліцы Беларусь: Павышэнне ролі сельскага прадпрымальніцтва ў РБ шляхам стварэння і запуску ў Камарова сельскага бізнес-інкубатара». У склад журы ўвайшлі прадстаўнікі мясцовай выканаўчай улады, бізнесу, беларускіх і замежных грамадскіх арганізацый.
Па выніках галасавання 5 з прадстаўленых 9 мясцовых прыватных ініцыятыў атрымаюць фінансавую падтрымку ад праекта Еўрапейскага саюза ў памеры ад 2 да 10 тысяч еўра. Таксама другі шанец пазмагацца за фінансаванне атрымалі 3 бізнес-ініцыятывы, недабраў патрэбнай колькасці балаў на першым Стартап Уікендзе.
Найбольшую колькасць балаў набрала ініцыятыва Ігара Хвашчэўскі са Смаргонскага раёна. Яна накіравана на вытворчасць біягумусу з утылізацыяй адходаў БРЖ па арганічным стандартам рэгулявання ЕС. Ігар Хвашчэўскі яшчэ ў 2014 годзе заснаваў ферму «Верма Экапрадукт», якая спецыялізуецца на арганічным спосабе вядзення гаспадаркі і мае адпаведны сертыфікат. У планах фермы наладзіць вытворчасць арганічнага ўгнаення ‒ біягумусу, для чаго неабходна набыць дадатковае пагалоўе буйной рагатай жывёлы.
Фінансавую падтрымку праекта ЕС таксама атрымае бізнес-ідэя па наладжванні ўласнай вытворчасці камбікорму на ферме, якая выводзіць трусоў. Яе аўтар Аляксандр Гатоўка з Мядзельскага раёна ўжо некалькі гадоў разводзіць трусоў і адчувае недахоп грануляванага камбікорму. Ён плануе вырашыць дадзеную праблему шляхам стварэння лініі гранулявання.
Высока ацанілі члены журы і бізнес-ідэю па арганізацыі буйнога сямейнага пчалярскага прадпрыемства на базе існуючага пчэльніка. Яе прадстаўляў Аляксандр Марозік, які даўно разводзіць пчол і займаецца продажам мёду, праполісу, пяргі, пылка, маткавага малачка ў Астравецкім раёне.
Адным з пераможцаў таксама стаў Іван Мацюк з аграгарадка Залессе. Ён плануе пабудаваць і ўладкаваць трапезную на тэрыторыі ўласнай аграсядзібы «Паланэз», яна зможа змясціць 50 чалавек адначасова.
Таксама журы вырашыла падтрымаць будаўнічую кампанію «НАРС», заснаваную ў чэрвені 2017 года. Бізнэсмэн Дзмітрый Стралец плануе наладзіць вытворчасць растворных і бетонных сумесяў з дастаўкай іх да спажыўца і магчымасцю загрузкі ў аўтабетоназмешвальнік.
Нягледзячы на тое, што па выніках галасавання журы былі падтрыманы 5 бізнес-ініцыятыў, яшчэ 2 былі ўключаны ў ліст чакання. Калі будзе дазваляць бюджэт праекта, яны таксама будуць падтрыманы.
На папярэднім Стартап Уікендзе некалькі ідэй былі адпраўленыя на дапрацоўку. Паслухаўшы канкурсантаў, журы вырашыла падтрымаць сям'ю Трыбулевых. Яны плануюць адкрыць у Астравецкім раёне для турыстаў некалькі тураў па гукатэрапіі. За грошы праекта яны змогуць купіць сонечны калектар і ўсталяваць ачышчальнае збудаванне для сваёй аграсядзібы.
Як адзначыў дырэктар вучэбна-практычнай установы па падтрымцы прадпрымальніцтва «БІКамарова» Эдуард Вайцяховіч, перамога ў Стартап уікендзе ‒ гэта толькі пачатак доўгага складана шляху па ўвасабленні бізнес-плана ў жыццё.
Нагадваем, што жыхары Смаргонскага, Мядзельскага, Пастаўскага і Астравецкага раёнаў могуць падаць заяўку на навучанне ў Школе сельскага бізнесу ў Камарова да 20 снежня 2017 года на сайце ecopartnerstvo.by.
Даведка:
Школа сельскага бізнесу ў Камарова працуе ў рамках праекта «Развіццё сельскіх тэрыторый у Рэспубліцы Беларусь: Павышэнне ролі сельскага прадпрымальніцтва ў РБ шляхам стварэння і запуску ў Камарова сельскага бізнес-інкубатара». Праект фінансуецца Еўрапейскім саюзам і сафінансуецца пасольствам ЗША ў Мінску, яго бюджэт складае 588 тысяч еўра, дзе ўклад ЕС ‒ 556,5 тысяч еўра. Праект рэалізуецца МГА «Экапартнёрства» і ГА «Жанчыны за адраджэнне Нарачанскага краю». Больш інфармацыі на ecopartnerstvo.by.
