У Гродне адбылася цырымонія адкрыцця першага энергаэфектыўнага дзіцячага садка.
Праект ЕС-ПРААН “Энергаэфектыўнасць у школах” выходзіць на фінішную прамую.
У Гродзенскім дзіцячым садку №45, які з’яўляецца пілотным аб'ектам праекта ЕС-ПРААН і Дэпартамента па энергаэфектыўнасці Дзяржстандарту Рэспублікі Беларусь “Энергаэфектыўнасць у школах”, укаранілі сучасныя энергазберагальныя і энергаэфектыўныя тэхналогіі.
Ва ўрачыстай цырымоніі адкрыцця садка, якая адбылася ў Гродне 16 верасня 2016 года, узялі ўдзел:
Лісковіч Віктар Андрэевіч, Намеснік старшыні Гродзенскага абласнога выканаўчага камітэта, дэпутат Палаты Прадстаўнікоў Нацыянальнага сходу Рэспублікі Беларусь;
Камашка Уладзімір Мікалаевіч, Намеснік дырэктара Дэпартамента па энергаэфектыўнасці Дзяржстандарту Рэспублікі Беларусь;
Гой Мечыслаў Браніслававіч, Старшыня Гродзенскага гарадскога выканаўчага камітэта;
Аўдроне Урбанавічутэ, Кіраўніца аперацыйнага аддзелу праектаў і праграм Прадстаўніцтва Еўрапейскага Саюза ў Рэспубліцы Беларусь, Дарадца;
Чульба Ігар Іванавіч, каардынатар праектаў Праграмы Развіцця Арганізацыі Аб’яднаных Нацый (ПРААН).
Дзякуючы 24 сонечным калектарам, усталяваным на даху будынка, можна награваць ваду да 60 градусаў. Паводле слоў загадчыцы дзіцячага садка №45 Людмілы Кушнірук, пасля завяршэння цеплавой мадэрнізацыі выдаткі на энергаспажыванне зменшыліся ўдвая. Папярэднія разлікі паказваюць, што меркаваная эканомія дасягне 180 000 рублёў на год.
Замест старых вокнаў у дзіцячым садку ўсталявалі двухкамерныя шклопакеты, дах і сцены ўцяплілі. Сістэма вентыляцыі з рэкуперацыяй дазволіць скараціць страты цяпла на 28-30%, што прадставіць эканамічную эфектыўнасць выкарыстання такіх тэхналогій у навучальных карпусах.
У харчблоку дзіцячага садка размешчана новае энергаэфектыўнае абсталяванне, выкарыстоўваецца індукцыйная пліта і спецыяльны посуд.
Акрамя гэтага, цягам рэалізацыі праекта, у дзіцячым садку праводзілася актыўная адукацыйная праца па прапагандзе “зялёнага” ладу жыцця. Намесніца кіраўніка аперацыйнага аддзелу праектаў і праграм Прадстаўніцтва ЕС у Беларусі, Дарадца Аўдроне Урбанавічутэ адзначыла, што ў Еўрапейскага саюза ўжо ёсць напрацаваны досвед узаемадзеяння з мясцовымі супольнасцямі па гэтым пытанні: “Мы пераканаліся, што праз дзяцей мы можам шмат чаму навучыць старэйшае пакаленне”.
Выхаванцы дзіцячага садка падрыхтавалі для гасцей “энергаэфектыўную” канцэртную праграму. Напрыканцы мерапрыемства ганаровыя госці і юныя артысты абмяняліся памятнымі сувенірамі.
Адкрыццё яшчэ трох энергаэфектыўных устаноў адукацыі ў рамках праекта "Энергаэфектыўнасць у школах” мае адбыцца ў найбліжэйшыя два месяцы.
