Узятае на сябе ЕС абавязальніцтва выдзеліць дадатковыя сродкі Еўрапейскаму банку рэканструкцыі і развіцця ў памеры 6 мільёнаў еўра на 4 гады надае новы імпульс праграме "Кансультацыі для малога бізнесу" (ASB) ЕБРР у Беларусі.
Больш за 200 мясцовых малых і сярэдніх прадпрыемстваў (МСП) змогуць скарыстацца экспертнымі рэкамендацыямі і ноў-хаў, прапанаванымі праграмай. Асаблівая ўвага будзе засяроджана на ахопе кампаній за межамі сталіцы і абласных цэнтраў Беларусі.
Чакаецца таксама, што новыя сродкі дазволяць ЕБРР працаваць з адабранымі дзяржаўнымі прадпрыемствамі для садзейнічання іх рэструктурызацыі і магчымай прыватызацыі.
Падтрымка ЕС, якая ажыццяўляецца ў рамках ініцыятывы EU4Business *, атрымала поўнае ўхваленне беларускіх уладаў.
Пасол ЕС у Рэспубліцы Беларусь Андрэа Віктарын заявіла: "Сёння ЕС з радасцю паведамляе аб выдзяленні 6 мільёнаў еўра на падтрымку малога бізнесу ў Беларусі. ЕС з'яўляецца адным з найбуйнейшых акцыянераў ЕБРР, і мы абапіраемся галоўным чынам на нашых партнёраў з Банка ў рэалізацыі абноўленай праграмы "Кансультацыі для малога бізнесу "у Беларусі, распаўсюджваючы яе дзеянне на новыя вобласці і раёны Беларусі".
Міністр эканомікі Беларусі Уладзімір Зіноўскі, які прымаў у сваім міністэрстве цырымонію падпісання пагаднення, сказаў: «Урад Беларусі падтрымлівае намаганні ЕБРР па развіцці прыватнага сектара Беларусі пры падтрымцы Еўрапейскага саюза. Кансультатыўная праграма адыграла важную ролю ў развіцці шэрагу малых і сярэдніх кампаній, што дазволіла ім павысіць сваю эфектыўнасць і ў некаторых выпадках дапамагло трансфармавацца ў перадавікоў прыватнага сектара».
Прэзідэнт ЕБРР Сума Чакрабарці заявіў: «Мы хацелі б падзякаваць ЕС за прадастаўленне гэтых рэсурсаў. Дзякуючы гэтаму будзе аказана падтрымка многім беларускім прыватным прадпрыемствам, якія іграюць усё больш важную ролю ў мясцовай эканоміцы".
Новая праграма «Кансультацыі для малога бізнесу» будзе абапірацца на шырокі вопыт ЕБРР ў пытаннях прадастаўлення кансультацыйных паслуг у Беларусі (праз мясцовых кансультантаў альбо міжнародных галіновых экспертаў) і фінансавання з моманту пачатку рэалізацыі праграмы ў 2012 годзе. За перыяд з 2012 па 2016 год у рамках праграмы аказана падтрымка больш за 250 суб'ектам МСП ў Рэспубліцы Беларусь, што дапамагло гэтым прадпрыемствам стварыць звыш 1500 новых працоўных месцаў і павялічыць выручку ў сярэднім на 63%.
З пачатку сваёй дзейнасці ў Беларусі ў 1992 годзе ЕБРР інвеставаў амаль 1,9 мільярда еўра ў 90 праектаў у розных галінах эканомікі краіны.
* Ініцыятыва «EU4Business» накіравана на развіццё прыватнага сектара праз прадастаўленне МСП дапамогі ў набыцці новых навыкаў, павышэнні сваёй канкурэнтаздольнасці, атрыманні доступу да фінансавання і павелічэнні аб'ёму экспарту на новыя рынкі, уключаючы ЕС. Ініцыятыва адносіцца да ўсіх краін Усходняга партнёрства: Арменіі, Азербайджана, Беларусі, Грузіі, Малдовы і Украіны. У рамках ініцыятывы таксама аказваецца падтрымка ўрадам у пытаннях правядзення рэформ, накіраваных на паляпшэнне дзелавога клімату.
