Якой інфармацыі не хапае спажыўцам аб рабоце жыллёва-камунальных службаў? Наколькі шырока пастаўшчыкі жыллёва-камунальных паслуг прадстаўляюць інфармацыю аб сваёй працы?
Пра гэта ішла размова на семінары "Сацыяльная падсправаздачнасць як інструмент павышэння якасці жыллёва-камунальных паслуг", які прайшоў 20 ліпеня ў Мінску. У мерапрыемстве ўзялі ўдзел прадстаўнікі раённых выканаўчых камітэтаў, сектара ЖКГ, грамадскіх арганізацый і іншыя зацікаўленыя бакі.
На мерапрыемстве былі прадстаўлены вынікі даследавання ступені задаволенасці спажыўцоў якасцю жыллёва-камунальных паслуг, праведзенага ў Вілейскім і Іўеўскім раёнах.
- 20-25% грамадзян у ходзе аналізу ў Вілейскім і Іўеўскім раёнах назвалі галоўнай праблемай нізкую якасць пітной вады і яе слабы напор, прычым 80-85% згодны дадаткова плаціць за вырашэнне гэтай праблемы, - адзначыў загадчык лабараторыі эканамічных праблем у будаўніцтве ААТ "НДІ Будэканоміка" Андрэй Бахматаў. - Аднак 14-17% усіх апытаных выказалі абыякавасць па пытаннях ЖКГ, што сігналізуе аб падрыве даверу грамадзян да дадзенай галіны. Больш падрабязна з вынікамі даследавання можна азнаёміцца на сайце ecopartnerstvo.by.
Адной з прычын такіх адносін эксперт назваў адсутнасць у спажыўца інфармацыі аб фарміраванні тарыфаў на жыллёва-камунальныя паслугі. Эксперт парэкамендаваў размяшчаць інфармацыю аб фарміраванні тарыфаў, расходаў ЖКГ, планах па развіцці сектара ў шырокім доступе, напрыклад, на інтэрнэт-рэсурсах і мясцовых СМІ, друкаваць у жыроўках, а не абмяжоўвацца аб'явамі на інфармацыйных дошках.
Андрэй Бахматаў прывёў прыклад Галандыі, дзе мясцовыя СМІ кожны тыдзень публікуюць паказчыкі якасці вады, абавязкова абмяркоўваюць павышэння тарыфаў на паслугі, тлумачаць, куды пойдуць грошы ад тарыфаў, напрыклад, на рэканструкцыю інжынерных сетак.
На мерапрыемстве былі прадстаўлены беларускія прыклады паспяховай практыкі ўзаемадзеяння ЖКГ і спажыўцоў. Напрыклад, эфектыўным інструментам для інфармавання грамадзян аб рабоце службаў ЖКГ служыць партал Мінгарвыканкама «Мой город - 115.бел». Інтэрнэт-рэсурс дазваляе спажыўцам паведамляць камунальным службам аб праблемных пытаннях і бачыць рашэнне па іх звароце.
Мала хто ведае, што Мінжылкамгас выпускае цэлы шэраг інфармацыйных рэсурсаў, якія даюць сваім чытачам шырокую інфармацыю аб рабоце службаў ЖКГ і могуць быць цікавыя як спецыялістам, так і звычайным спажыўцам. Найбольш дынамічна цяпер расце аўдыторыя Партала камунальнай граматнасці, падкрэсліла галоўны рэдактар ГП «Жилкомиздат» Ірына Фаміна.
Аб узаемадзеянні са спажыўцамі праз сацыяльныя сеткі расказала выканаўчы дырэктар МГА "Экопартнёрства" Аліна Бушмовіч. У рамках праекта Еўрапейскага саюза "Патрэба ў эфектыўным кіраванні жыллёва-камунальнай гаспадаркай" былі створаны два інфармацыйных цэнтра аб рабоце ЖКГ у сацыяльнай сетцы Вконтакте, дзе мясцовыя жыхары могуць задаць пытанні і атрымаць кампетэнтныя адказы, а таксама знайсці карысную інфармацыю аб абыходжанні з адходамі, водаадвядзенні і іншых тэмах. Дзякуючы праекту, у Іўеўскім і Вілейскім раёнах пачалі праводзіцца грамадскія прыёмныя па пытаннях жыллёва-камунальнай сферы.
Міжнародны вопыт удзелу грамадскасці ў прыняцці рашэнняў у сферы ЖКГ прадставіў эксперт у галіне электроннага кіравання Дэпартамента ААН па сацыяльна-эканамічных пытаннях (UNDESA), Юрый Міснікаў. На яго думку, для дасягнення эфектыўнага ўзаемадзеяння ЖКГ і мясцовых супольнасцяў у Беларусі неабходна выкананне трох пунктаў: распрацоўка заканадаўчай базы, стварэнне грамадскіх каардынацыйных саветаў, а таксама адкрытасць і празрыстасць сістэмы работы дзяржорганаў.
Семінар прайшоў у рамках праекта "Патрэба ў эфектыўным кіраванні жыллёва-камунальнай гаспадаркай", які рэалізоўваецца МГА "Экопартнёрства" сумесна з Вілейскім і Іўеўскім райвыканкамамі і Беларускім таварыствам абароны спажыўцоў.
Мерапрыемствы праекта ЕС спрыяюць развіццю сацыяльнай падсправаздачнасці ў сферы ЖКГ, калі спажыўцы атрымліваюць магчымасць ацаніць якасць жыллёва-камунальных паслуг, уносіць свае прапановы па іх паляпшэнні і ўдзельнічаць ва ўпраўленні сектарам.
