Які бізнес можна пабудаваць на любові да рыбалцы? Як падключыць усіх членаў сям'і да ўвасаблення сваёй мары па стварэнню вытворчасці цацак? Ці з'явіцца ў курортным пасёлку Нарач аўтфкафе? На гэтыя пытанні адказалі ўдзельнікі чацвёртага Стартап Уікенда ў Камарова, які прайшоў 11 мая 2018 года.
На мерапрыемстве свае бізнес-ідэі прадстаўлялі жыхары Мядзельскага, Астравецкага, Пастаўскага і Смаргонскага раёнаў, якія прайшлі навучанне ў Школе сельскага бізнесу ў Камарова са студзеня па красавік 2018 года. Строгае журы з прадстаўнікоў мясцовых уладаў, бізнесменаў, беларускіх і замежных грамадскіх арганізацый вызначалі, якія ініцыятывы атрымаюць фінансавую падтрымку ў памеры ад 2 да 10 тысяч еўра ад праекта Еўрапейскага саюза.
Вышэй за ўсё журы ацаніла ініцыятыву Іллі Агаркава па перапрацоўцы адходаў птушкафабрык у жывыя лічынкі мух (апарышаў) і зоогумус. Прадпрымальнік плануе забіраць адходы прадпрыемстваў на ўласным транспарце і карміць імі адмысловы від мух, што дазволіць яму дапамагчы прадпрыемствам з утылізацыяй адходаў і забяспечыць зоамагазіны, рыбакоў і фермераў апарышамі. Вытворчасць будзе размяшчацца ў вёсцы Панара ў 14 км ад Смаргоні. Калі ў прадпрымальніка атрымаецца рэалізаваць усе свае планы, то ў будучыні тут жа з'явіцца вытворчасць рыбы і ракаў.
Прыватная ініцыятыва Дзмітрыя Івашэнка па вырабе дзіцячых цацак не пакінула абыякавых удзельнікаў мерапрыемства. Дзмітрый ужо даўно займаецца сталярствам і вырабляе мэблю на заказ ва ўласнай майстэрні. Ідэя заняцца новым напрамкам нарадзілася нездарма: будучы татам траіх дзяцей, ён стараецца даць ім толькі самыя экалагічна бяспечныя і цікавыя цацкі. Сваіх сыноў ён жартам называе «аддзелам кантролю якасці», а жонка дапамагае з дызайнам будучых вырабаў. Драўляныя цацкі ад брэнда «Тата Дзіма» змогуць набыць людзі з розным дастаткам: базавы набор будзе каштаваць 15 рублёў, а больш пашыраная камплектацыя 25-30 рублёў.
Сям'я Марозавых прадстаўляла свой бізнес-план па вырошчванні буйной рагатай жывёлы разам. Павел і Сняжана ўжо не першы год займаюцца жывёлагадоўляй. Сняжана нават паспела адвучыцца ў першым выпуску Школы сельскага бізнесу і прадставіць бізнес-план па адкрыцці сыраварні, але тады яна не стала пераможцам Стартап Уікэнда. У гэты раз бізнес-план распрацаваў муж і складаўся ён у вырошчванні на продаж мясной пароды быкоў. У планах прадпрымальнікаў купляць зусім маладых жывёл у вазе каля 100 кг і гадаваць іх да 600 кг, пасля чаго прадаваць іх аптовым пакупнікам.
Юрый Абрамовіч з Мядзельскага раёна пераканаў членаў журы ў тым, што пасёлку Нарач не хапае аўтакафе з смачнымі блінцамі для мясцовых жыхароў і турыстаў. Апошніх, па дадзеных прадпрымальніка, у пасёлку за год бывае каля 60.000 тысяч, а месцы грамадскага харчавання можна пералічыць на пальцах. Для рэалізацыі свае бізнес-ідэі прадпрымальніку не хапае толькі спецыяльнага аўтапрычэпа, які ён плануе купіць за грошы праекта.
Падтрымала журы і ідэю Анатоля Касценя з Пастаўскага раёна па стварэнні майстэрні па рамонце абутку з артапедычным ухілам. Прадпрымальнік ужо даўно рамантуе абутак і мадэрнізуе яго ў выпадку асаблівых патрэбаў кліентаў, а з дапамогай фінансавай падтрымкі праекта зможа палепшыць і пашырыць якасць аказваемых паслуг. Ініцыятыва была высока ацэнена журы дзякуючы таму, што спрыяе памяншэнню адукацыі новых адходаў.
Наступны Стартап Уікэнд пройдзе ў ліпені і на ім свае бізнес-планы змогуць прадставіць усе жадаючыя адкрыць сваю справу з 4 раёнаў, нават калі яны не праходзілі навучанне ў Школе сельскага бізнесу ў Камарова.
Даведка
Школа сельскага бізнесу ў Камарова працуе ў рамках праекта «Развіццё сельскіх тэрыторый у Рэспубліцы Беларусь: Павышэнне ролі сельскага прадпрымальніцтва ў РБ шляхам стварэння і запуска ў Камарова сельскага бізнес-інкубатара». Праект фінансуецца Еўрапейскім саюзам і сафінансуецца пасольствам ЗША ў Мінску, яго бюджэт складае 588 тысяч еўра, дзе ўклад ЕС ‒ 556,5 тысяч еўра. Праект рэалізуецца МГА «Экапартнёрства» і ГА «Жанчыны за адраджэнне Нарачанскага краю». Больш інфармацыі на ecopartnerstvo.by.
