Абвешчаныя пераможцы Еўрапейскай прэміі ў галіне ўстойлівай энергіі ‒ 2020 для краін Усходняга партнёрства!

Сёння на цырымоніі ўзнагароджання ў рамках Тыдня ўстойлівай энергіі ЕС былі абвешчаныя пераможцы другой Прэміі ЕС у галіне ўстойлівай энергіі для краін Усходняга партнёрства. Член Еўрапейскай Камісіі па пытаннях суседства і пашырэння Олівер Вархеі павіншаваў усіх прызёраў. Галоўны прыз быў уручаны праекту «Зялёнае святло ‒ Малдова ‒ мадэрнізацыя і энергазберажэнне ў вулічным асвятленні».

Другое месца заняў праект «ЕС для грамадзянскай супольнасці: энергаэфектыўнасць у армянскіх грамадах», а трэцяе месца заняў праект «Энергія з біямасы і энергаэфектыўныя тэхналогіі ў Грузіі». Усе праекты, якія ўдзельнічаюць у конкурсе, фінансаваліся ЕС.

Праект-пераможца з Малдовы быў запушчаны ў рамках ініцыятывы, якая падтрымліваецца ЕС, «Пагадненне мэраў ‒ Дэманстрацыйныя праекты». Два гарады, Окніца і Кантэмір, усталявалі сучаснае, энергаэфектыўнае вулічнае асвятленне ў рамках праграмы па скарачэнні выкідаў CO2 на 20% да 2020 года. Прэмія ЕС у галіне ўстойлівай энергіі для краін Усходняга партнёрства была заснаваная ў 2019 годзе і дэманструе натхняльныя ўзоры інавацыйных рашэнняў у галіне энергаэфектыўнасці і аднаўляльных крыніц энергіі ў рэгіёне, якія прыносяць карысць як грамадзянам, так і бізнесу.

Пераможцы былі абраныя шляхам публічнага галасавання з кароткага спісу шасці фіналістаў.

Энергаэфектыўнасць з’яўляецца ключавой мэтай палітыкі ў рамках Усходняга партнёрства. За апошнія дзесяць гадоў у гэтую галіну было інвеставана каля 170 мільёнаў еўра, прычым адна дзясятая частка насельніцтва краін Усходняга партнёрства атрымала выгаду ад больш энергаэфектыўнай і даступнай муніцыпальнай інфраструктуры і паслуг. Праца ў гэтай галіне працягваецца, і павышаная ўвага будзе нададзена пытанням устойлівасці навакольнага асяроддзя і клімату.