Еўрапейскі гуманітарны ўніверсітэт — беларускі ўніверсітэт у Вільні — абвяшчае аб пачатку Дадатковага набора на бакалаўрскія і магістарскія праграмы, які працягнецца да 14 жніўня. Навучальны корпус ЕГУ месціцца ў Аўгустынскім кляштары Старога горада Вільні, які ўнесены ў спіс Сусветнай спадчыны ЮНЕСКА.
У 2020 годзе ЕГУ прапаноўвае абітурыентам з Беларусі навучанне па мадэлі вольных мастацтваў (liberal arts), гранты на навучанне, стыпендыі, а таксама магчымасць па ўдзелу ў студэнцкіх абменах і стажыроўках Erasmus+. Дзякуючы падтрымцы Еўрапейскага саюза, за 15 гадоў працы ў Вільні ЕГУ скончылі 2577 выпускнікоў, 95% з іх — беларусы.
Дадатковы набор ладзіцца на наступныя праграмы (на падставе сярэдняй і сярэдняй спецыяльнай адукацыі).
Сталая форма:
- Бакалаўрская праграма «Еўрапейская спадчына»
- 5-гадовая праграма бесперапыннага навучання «Міжнароднае права і права Еўрапейскага саюза»
Працяглая (дыстанцыйная) форма:
- Бакалаўрская праграма «Візуальны дызайн»
- Бакалаўрская праграма «Медыя і камунікацыя»
- Бакалаўрская праграма «Сусветная палітыка і эканоміка»
Апроч гэтага, ЕГУ паведамляе аб пачатку суцэльна новай бакалаўрскай праграмы «Акторскае майстэрства», якая была падрыхтавана ў цеснай супрацы з Рускім драматычным тэатрам Літвы. На дадзены момант праграма знаходзіцца на стадыі рэгістрацыі. Прыём абітурыентаў на сталую форму дадзенай праграмы працягнецца да 3 верасня.
Для асобаў з вышэйшай адукацыяй (ступень бакалаўра, спецыяліста і інш.) Дадатковы набор ладзіцца на наступныя праграмы:
- Магістарская праграма «Візуальная пластыка»
- Магістарская праграма «Публічная палітыка»
- Магістарская праграма «Развіццё культурнай спадчыны»
Да 28 жніўня ЕГУ працягвае прыём заяў на доктарскую праграму па накірунку «Філасофія».
Падрабязная інфармацыя аб правілах паступлення ў ліберальны ўніверсітэт у Вільні месціцца па спасылцы.Здаць уступныя іспыты па эсэ, кампазіцыі, мастацкім выкананні і англійскай мове ў гэтым годзе можна анлайн. З тэрмінамі здачы іспытаў запрашаем азнаёміцца тут.
Па выніках разгляда анкет абітурыентаў Прыёмная камісія прыме рашэнне аб запрашэнні абітурыентаў на анлайн-сумоўе. Абітурыенты, якія паступаюць на магістарскія праграмы, мусяць прадставіць даследчы праект па абраным навуковым накірунку і здаць анлайн-іспыт па англійскай мове.
Запрашаем азнаёміцца з 40 вэбінарамі, якія сёлета зладзілі студэнты, выпускнікі, выкладчыкі і супрацоўнікі ЕГУ для абітурыентаў і ўсіх тых, хто цікавіцца найбольш актуальнымі пытаннямі гуманітарных, сацыяльных навук і мастацтваў.
Кансультацыі па паступленні ладзяцца па эл. пошце recruitment@ehu.lt, Skype: QuestionEHU, а таксама на старонках універсітэта ў сацыяльных сетках VK, Facebook, Instagram.
