Партал «Зялёная мапа» атрымаў прэстыжную ўзнагароду конкурсу Сусветнай сустрэчы на вышэйшым узроўні па пытаннях інфармацыйнага грамадства (ССУІГ 2017). Рэсурс заняў першае месца ў намінацыі «Электроннае навакольнае асяроддзе». Узнагароджанне пераможцаў конкурсу адбылося ў Жэневе (Швейцарыя) 13 чэрвеня 2017 г. у рамках правядзення Форума ССУІГ.
«Зялёная мапа» – грамадскі праект, які рэалізуецца арганізацыяй «Цэнтр экалагічных рашэнняў» пры падтрымцы праекта «Спрыянне пераходу Рэспублікі Беларусь да «зялёнай» эканомікі», што рэалізуецца Праграмай развіцця ААН у партнёрстве з Міністэрствам прыродных рэсурсаў і аховы навакольнага асяроддзя Рэспублікі Беларусь, пры фінансавай падтрымцы Еўрапейскага саюза.
На партале сабрана інфармацыя пра значныя экалагічныя аб'екты: пункты збору; арганізацыі, што займаюцца аховай навакольнага асяроддзя; месцы, дзе знаходзяцца аб'екты, што працуюць на альтэрнатыўнай энергіі; унікальныя прыродныя зоны. «Зялёная мапа» дапамагае жыхарам Беларусі зрабіць сваё жыццё больш «зялёным» – даведацца, дзе ў іх горадзе можна здаць на перапрацоўку пластык, шкло, паперу і іншыя адыходы і другсыравіну, знайсці месцы размяшчэння сонечных панэляў, калектараў і ветрагенератараў, а таксама паркаў, сквераў, заказнікаў.
Узнагароды ССУІГ прысуджаюцца за выбітныя праекты, з дапамогай якіх мабілізуецца патэнцыял інфармацыйна-камунікацыйных тэхналогій для паскарэння сацыяльна-эканамічнага развіцця ва ўсім свеце. Конкурс праводзіцца па 18 катэгорыях, сёлета ў ім спаборнічалі 345 праектаў з усяго свету. У ходзе анлайн-галасавання, якое праходзіла з 30 сакавіка па 30 красавіка, была пададзена рэкордная колькасць галасоў – 1,1 млн. Сярод 90 праектаў, якія выйшлі ў фінал, экспертнае журы шляхам галасавання адабрала пераможцаў.
Праект «Спрыянне пераходу Рэспублікі Беларусь да «зялёнай» эканомікі», у рамках якога рэалізавана пілотная ініцыятыва, аказвае спрыянне Рэспубліцы Беларусь у фарміраванні эканамічнага ўзросту, заснаванага на «зялёных» прынцыпах, уключаючы экалагічна ўстойлівае і эканамічна мэтазгоднае выкарыстанне прыродных рэсурсаў, прасоўванне экалагічна ўстойлівай вытворчасці і спажывання, стварэнне «зялёных» працоўных месцаў, змену мадэляў паводзін і функцыянавання прадстаўнікоў мэтавых груп у бок большай экалагічнай устойлівасці. Бюджэт праекта – 5 000 000 еўра.
