На працягу 12 дзён рабят чакаюць інтэрактыўныя гульні і экскурсіі, заняткі па экалагічнаму маніторынгу, дыскусіі і конкурсы. Школьнікі асвояць спецыяльную праграму па шасці тэматычных блоках: «Біяразнастайнасць», «Энергазберажэнне», «Водазберажэнне», «Інфармацыйна-экалагічныя мерапрыемствы», «Абыходжанне з адходамі», «Экалагічны маніторынг навакольнага асяроддзя». Такая праграма ўпершыню распрацавана ў Рэспубліцы Беларусь і атрымала станоўчую рэцэнзію і ацэнку ў Міністэрстве адукацыі Рэспублікі Беларусь.
Экалагічныя змены – адзін з этапаў Праекта міжнароднай тэхнічнай дапамогі «Далучэнне грамадскасці ў экалагічны маніторынг і паляпшэнне кіравання аховай навакольнага асяроддзя на мясцовым узроўні», што фінансуецца Еўрапейскім саюзам і рэалізуецца ПРААН у партнёрстве з Міністэрствам прыродных рэсурсаў і аховы навакольнага асяроддзя. Ён дае новы магутны імпульс развіццю сеткі «Зялёных школ» у Беларусі.
У рамках Праекта праведзена рэканструкцыя памяшканняў для «Зялёнага класа», закуплены абсталяванне і інтэрактыўныя матэрыялы.
У «Зялёным класе» будуць займацца не толькі ўдзельнікі экалагічных летніх змен, але і школьнікі, якія прыязджаюць у цэнтр «Надзея» з усёй краіны на аздараўленне на працягу года, у тым ліку з раёнаў, пацярпелых ад наступстваў катастрофы на ЧАЭС. «Зялёны клас» таксама будзе даступны для дзяцей з абмежаванымі магчымасцямі: прадугледжана стварэнне безбар'ернага асяроддзя.
Урачыстае адкрыццё «Зялёнага класа» ў цэнтры «Надзея» адбылося 11 ліпеня падчас правядзення Дня адчыненых дзвярэй гадовай экалагічнай змены.
