У новым цэнтры створаны ўсе ўмовы для камфортнага адпачынку людзей з абмежаванымі магчымасцямі, ён стаў фінальнай часткай праекта «Валожын без бар’ераў», рэалізаванага пры падтрымцы Еўрапейскага саюза.
На адкрыцці таксама выступіў старшыня Валожынскага раённага выканаўчага камітэта Яўген Круковіч. Валожынскі райвыканкам – вядучы партнёр праекта.
Партнёрамі таксама з’яўляліся грамадскія аб’яднанні «Беларускае таварыства інвалідаў» і «Адпачынак у вёсцы», фонд «Інтэракцыя».
Кажучы пра ўклад мясцовых органаў улады ў рэалізацыю праекта, Дырк Шубель адзначыў, што «Валожын без бар’ераў» адбыўся таксама і дзякуючы ініцыятыве грамадзянскай супольнасці: «Праект з’яўляецца адным з найбольш аб’ёмных грантаў Еўрапейскага саюза ў гісторыі мясцовых супольнасцей у Беларусі ‒ амаль адзін мільён еўра быў накіраваны на яго рэалізацыю».
Удзельнікі падзеі таксама пабывалі ў Налібоцкай пушчы на ўнікальнай інклюзіўнай экасцяжыне «Белакарэц», створанай у рамках праекта.
На працягу амаль паўтара кіламетра ‒ інтэрактыўныя стэнды, тактыльныя карты і макеты, даступныя альтанкі і біяпрыбіральні. Госці сцежкі могуць згуляць у гульню з птушкамі, убачыць рыб ракі Іслач, сабраць сваю лячэбную гарбату. Тактыльныя макеты і мапы пазнаёмяць з жывёламі пушчы і пакажуць дарогу.
«Праект скончыўся ў перыяд развіцця эпідэміі COVID, якая закранула самыя неабароненыя слаі насельніцтва. Але мы ўпэўненыя, што ён адкрыў магчымасці вучыцца ў складанай сітуацыі, распрацоўваць стратэгіі дапамогі і падтрымкі людзям з абмежаванымі магчымасцямі і пажылым людзям», ‒ пракаментаваў Дырк Шубель.
Даведацца аб асноўных выніках праекта «Валожын без бар’ераў» можна тут.
